Independent Media: Umqeqeshi we'Orlando Pirates, uJose Riveiro, ujonge impumelelo xa iqela lakhe lidibana neSuperSport United emdlalweni weNedbank Cup ngomso.
Image: Itumeleng English Independent Media
Ngale mpelaveki, iNedbank Cup ingena kuvuthondaba. Omnye wemidlalo oza kutsala umdla wabathandi bebhola ekhatywayo ngophakathi kweSuperSport United ne'Orlando Pirates ngentsimbi yesithathu emalanga ngomso e'Old Peter Mokaba Stadium.
UJose Riveiro uxelele iintatheli izilo ukuba iPirates iza kudlalela ukuphumelela nakubeni esazi ukuba ngeke ibe yinto Elula ukudlula kwiSuperSport United. IPirates ithathe indebe yeNedbank kathathu amatyeli elandelana, uRiveiro uthi injongo yayo kukuya emdlalweni wokugqibela nakulo unyaka.
Umdlalo uza kutaka iintlantsi ngoba Amatsatsantsa asePitoli aya emdlalweni efuna impindezelo. Ekuqaleni kwesizini eqhubekayo, abethwa yiPirates kakubi kwiMTN8 aphuma kuyo. Ngaphandle kwaleyo, afuna ukufunqula ukuzithemba kokwenza kakuhle kwiNedbank Cup njengokuba engaqhubi kakuhle ncam kwiBetway Premiership.
"Sizama ukulungiselela umdlalo ngoba siyazi ukuba uza kuba nzima. Iqela esiza kudlala nalo nendawo esiza kudlalela kuyo ziza kuba nefuthe emdlalweni," utshilo uRiveiro. Nangona umdlalo uza kudlalelwa ebaleni leSuperSport - kodwa iPirates izimisele ukuphumelela itsho idlulele phambili kwiNedbank Cup.
"Ngumdlalo wokhuphiswano lo sijongene nawo. Zimbini izinto ezingenzeka emdlalweni - kodwa injongo yethu kukudlala bhetele ukuze sikwazi ukudlulela phambi. Xa ndijongile, umdlalo uza kutaka iintlantsi," utshilo umqeqeshi phambi kokuphawula ngokuxinana kwemidlalo elandelayo nakubeni iPirates yakhe ibikhe yaphumla kancinci.
"Njengokuba bendike ndatsho ngaphambili, imidlalo ixinene kakhulu futhi akukho nexesha lokujima. Ixesha esilichitha nabadlali ejimini alisonelanga singabaqeqeshi. Iziphumo zemidlalo zibalulekile kakhulu.
"Ukuphumelela kwethu kukona kusincedayo xa silungiselela imidlalo elandelayo. Kunzima kakhulu ukudlala xa ungafumani iziphumo ezihle kule ngxinano esikuyo. IPirates iya emdlalweni weNedbank Cup ikhuthazekile emva kokubetha iChippa United ngegowuli elinye emdlalweni weBetway Premiership ekuqaleni kwale veki eGqeberha.
Related Topics: