UMongameli uCyril Ramaphosa, uMongameli we'EU uGqirha Ursula von der Leyen noMongameli webhunga lamazwe aseYurophu uAntonio Luis Santos da Costa.
Image: File
UMongameli weli loMzantsi Afrika uCyril Ramaphosa uqhwabele izandla imbumba yamazwe aseYurophu (EU) ngokutyikitya isivumelwano sokutyala imali engaphezulu kweebhiliyoni ezine zeeyuro (€4.7 billion ≈ R94 billion).
URamaphosa uqinise amaqhina entsebenziswano phakathi koMzantsi Afrika nembumba yamazwe aseYurophu ekunye noMongameli we'EU, uGqirha Ursula von der Leyen, noMongameli webhunga lamazwe aseYurophu, uAntonio Luis Santos da Costa.
"SinguMzantsi Afrika, siyakwamkela ukuzibophelela kwe'EU ekuchitheni imali engaphaya kweebhiliyoni ezine zeeyuro kwimingxilo equka utyalo mali kweli loMzantsi Afrika," kutsho uRamaphosa.
UMzantsi Afrika uncanca iziqhamo zendlela obona ngayo kwizinto ezithile kwihlabathi eziquka inyathelo lawo malunga nomlo ubuphakathi kwelizwe lakwaSirayeli kwakunye nelizwe lasePalestina.
"Olu tyalo mali luza kuchaphazela izinto eziquka umbane, ezothutho, ukuveliswa kwamachiza ogonyo, namanye ke amachiza aphambili adingwa nguMzantsi Afrika," utsho uRamaphosa.
UMongameli webhunga lamazwe aseYurophu, uAntonio Luis Santos da Costa, uthi uMzantsi Afrika lilizwe elifanelekileyo ukuba basebenzisane nalo batyale imali kulo. "Kweli xesha linzima kangaka, kubalulekile ukuba uqiniseke ukuba ngubani osungula okanye oqinisa naye ubuhlobo, ukuze kukhulwe ngamacala omabini kuxhamle wonke ubani," kutsho uSantos da Costa.
Ngonyaka ka2021 ukuya kunyaka mali u2024, imbumba yamazwe aseYurophu yagalela imali ekwikhulu namashumi amabini anethoba ezigidi zeerandi neyathi yasetyenziswa kumbane, uphando ngqangi nezinye.
Related Topics: